由我家大少主演,從牙牙學語,到依家頂心頂肺!兩歲半至四歲的一個小紀錄.
身為父母的都該感到似曾相識!哈哈哈~~~
3歲11個月
人物：小寶(金魚)、我、鏗
鏗：媽咪點解小寶要叫小寶呀？
媽：唔知喎，你同爸爸一齊改嘛！大寶！
鏗：我唔係大寶呀！
媽：唔係咩？咁媽寶囉。哈哈
鏗：唔係呀！
媽：咁你係咩呀？
鏗：我係極速turbo !
媽：哈哈……快手換衫啦turbo!
鏗：媽咪小寶話要跟我地出去呀！
媽：小寶點會講呀！
鏗：有呀！不過我同佢講左唔可以喇！如果佢出去會俾人砍的。
媽：咩話？你講咩？小朋友點可以亂說話。你講咩砍呀！
鏗：砍即係用刀切囉。我話俾小寶知如果佢亂出去就會俾人用刀切。好似切隻雞咁呀！
媽：切雞？？你就唔方唔係鐵咀雞喇！
鏗：鐵咀雞？我係王綽鏗呀傻豬豬！
吹漲！邊度得黎發燒仲咁多口。好明顯我比較喜歡你去返學。因為對住你我的腦細胞一日死多幾百倍！！
晚飯中
爸：老婆，joseph個仔十月出世喇！
媽：咁快喇？
鏗：爸爸，joseph個仔十月出世，你個仔出左世喇喎。
媽：係呀，四年前出左世啦！八卦公。
躲在床上講悄悄話
媽：咦……原來你都有美人啄喎。
鏗：吓？我咩野俾人刴呀？
你放心你再成日激我，我遲早刴你的。
三歲十個月
鏗少語錄
1)恰眼瞓中
婆婆：鏗呀你一陣上堂唔好恰眼瞓喎。
鏗鏗：亞婆我恰眼瞓都可以專心姐。
2)媽媽努力拖地中
鏗鏗：媽咪唔該你擺個小心地滑嘅牌出黎啦！
衰仔我拖地你咪亂行就唔會跣親啦！
3)苦纏中
鏗鏗：媽咪你愛唔愛我？
媽媽：唔愛喎！
鏗鏗：點解呀？你愛我啦！
媽媽：你都唔乖梗唔係愛啦！
鏗鏗：咁我乖喇，你愛我啦！
媽媽：未乖呀！唔愛！
鏗鏗：愛啦愛啦！你講愛我，我就講可以我好愛你嘛！
亞仔愛呢家野邊有得逼㗎！哈哈~~~
4)生妹妹
鏗鏗：bb幾時出世呀？
媽媽：吓？邊個生呀？
鏗鏗：你囉！我問你呀！
媽媽：我都無bb，你傻左呀？
鏗鏗：係咪身體唔好無bb呀？
媽媽：係呀！所以無囉。
鏗鏗：咁你聽話夜晚早d瞓，早d起身做運動，好似我咁(示範運動中)。就會變得好強壯可以生bb喇！
有時真覺得你傻得好可愛。哈哈
我家少爺好多時都串串貢，做亞媽就快激死喇！
1)乘小巴中
鏗：媽咪你唔好成日問我咁多野喇！
媽：我幾時成日問你野呀？
鏗：無，我想講你聽如果你成日問我野，我會覺得你好煩㗎！
我當時只想講xyz#*
2)剛上巴士(已經等左十幾分鐘了)
司機正mark緊埋站資料
鏗：司機叔叔你好，點解你架車次次都咁耐！我地等左好耐喇！
司機無言，我同爸爸笑爆咀。
超爆！在餐廳食早餐，老闆問點解女仔都拎劍呀？o 咀了，老闆你睇住佢大仲未記得佢係男仔？更爆的是，我個仔的回答：伯伯我有雀㗎！仔呀斯文d好嗎？
剛踏入兩歲八個月的鏗鏗越來越多鬼主意。
1)昨晚同媽咪食完飯搭車回家時，我叫鏗拖住表弟慢慢行，點知表
弟就拖住鏗喪跑，媽咪驚佢地跌親就同表弟講鏗眼訓了要慢慢行呢！
話口未完鏗即時勁打呵欠，瞇眼扮訓，個衰野扮得好自然架，完完全
全交足戲。媽咪睇到笑死，我有理由相信上次佢被我罰企時訓左都係
做戲囉！
2)今日搭車出去食野，佢同我講d人唔舒服要搭救護車，咁我問佢
幾時唔駛搭架？鏗話d人無唔舒服，好返咪唔駛搭囉！哈~你真係多
左好多有條理的答案了。
3)當我早上起床，鏗見到我係會同我講咩呢？
答案係：媽咪你快d瞇埋眼訓覺啦！
我問點解？
答覆係：你瞇埋眼我可以玩電話囉！
當時有人已經拎住我部電話自己上左youtube睇緊懞面超人囉
！
與鏗鏗對話
4)
鏗：媽咪我去游水
媽：要等爸爸放假先喎
鏗：點解呀？
媽：因為媽咪唔識游，同你去好危險 架！
鏗：我識游架，我教你啦！
少爺你咁都算識呀？？我咪好危險？
5)星期日晚爸爸幫鏗沖涼
爸：鏗鏗你乖乖地爸爸聽日返一日工星期二同你去玩啦。之後又返多
四日星期日又可以同你去玩。
鏗：返一日就去玩呀？
爸：嗯
鏗：返好多日去玩呀？
爸：係呀
鏗：唔……爸爸成日要返工工好辛苦啊！
人地爸爸甜死左呀！
6)玩樂中
鏗：媽咪你wow呀！
媽：做咩要wow呀？？
鏗：你wow扮怪獸。我係超人黎打！
衰仔打亞媽！！
7)除褲
鏗：媽咪我要痾vv呀！
媽：自己除褲褲去痾啦！我整緊野。
鏗：痾完喇！著唔到褲褲。
媽：點會著唔到！抽上去咪得囉。
鏗：抽左喇！patpat走左出黎喎你幫我啦！
少爺你咁懶講完就拎埋枕頭趴在地等我幫你穿，係咪想我一腳踩落你
patpat上呀！
8)開枱食飯俾鏗笑死，今晚火腿蝦仁煎蛋、腐乳蒸雞。
大少食食下講：媽咪煮呢個好好味，火腿好彈牙。
鏗爸笑問蝦爽唔爽呀！大少話好爽呀！哈哈
9)有人越來越攪笑，呢兩日咁熱，午睡時當然想佢訓得舒服d,開個冷
氣俾佢嘆下啦！點知我一開冷氣有人就放聲大哭，我當然要問下原因
啦！得出結果係……
鏗：我唔要咁舒服呀！
我：點解呀？
鏗：我唔要訓咁耐呀，嗚嗚~~~
我：咩事呀？
鏗：我要玩呀，嗚嗚~~~
原來有人發現訓耐左玩的時間變少了呢 XD
10)午睡開始，開冷氣。喊聲已經不斷，唔好啦唔駛啦！媽咪熄左佢啦。
我當然明你心意，昨日唔開訓左個零鐘就起身可以去圖書館睇書嘛！
依家開左估計會訓三粒鐘。我欣賞你的新藉口，熄左佢啦我好凍呀！
少爺依家落緊雨，窗關上。風扇在廳你同我講好凍！？你係得嘅！
11)早餐篇
媽：鏗鏗今日食咩早餐呀？
鏗：食麵麵啦！我訓左一晚好肚餓要食麵麵呀！
先生你有邊一朝早唔係訓左一晚架！
12)打架篇
鏗：我頭先同珀僑打交！
媽：我講左唔可以打交喎！
鏗：我打佢細細力，佢打我好大力好痛。
媽：抵死！
鏗：但鏗鏗好開心，打交好好玩！鏗鏗變態呀！哈哈哈~~~
仔唔駛你講我都知你變態啦！
13)投訴篇(鏗爸幫佢沖涼中)
鏗：哼~鏗鏗好唔開心。
爸：做咩事呀？
鏗：媽咪上次同我去圖書館無借怪獸書，依家搵唔到。我搵搵搵都無
呀！
大人本書在圖書館內已經講左四次有多仲借黎做乜呀！！！駛唔駛同
你老豆打小報告呀！
14)按摩篇
鏗：爸爸唔好按耳仔！
爸：點解呀？
鏗：因為太痛呀！
駛唔駛'太'字都出埋呀！上次話對鞋太窄，昨晚話紅蘿蔔太硬，叫
你食飯就太飽。都唔知你幾時學識架！
15)食西瓜篇
鏗：媽咪我好叻識吐核
媽：係喇！你叻叻喇！
鏗：媽咪我食左好多西瓜，依家有個西瓜波(邊講邊摸住自己個肚)
哈哈~~~西瓜波？？可以踢嗎？
16)訓覺篇
鏗：媽咪我要同你訓~~~
媽：你訓呢度爸爸訓邊呀？
鏗：叫佢訓地下囉！
媽：唔係訓你巴斯床床咩？
鏗：唔可以！唔可以訓巴斯床床。要訓地下！
真陰公！超級霸道鬼！
17)小巴篇
一上小巴無停過口
鏗：司機叔叔~~司機叔叔早晨~~
鏗：媽咪話唔叫人無禮貌！
鏗：媽咪係咪有人上車就要坐你脾脾呀？
鏗：太陽伯伯太陽伯伯你去左邊？快d出黎哈哈笑哈哈笑！媽咪太陽
伯伯呢？
鏗：有人到站落車呀！byebye~~
鏗：媽咪呢個咩黎果個咩黎？
鏗：ee hihi
鏗：媽咪幾時落車呀？去買餸呀？你去買餸我自己去圖書館等你啦！
大少累未呀？全程未合上咀，高聲唱歌唔係人人識欣賞架！
鏗鏗語錄
18)坐巴士途中，自己踢甩隻鞋，被我同爸爸厲住佢。
鏗：隻鞋唔知點解甩左出黎呀！
19)叫佢夠鐘好訓覺了，在床上典來典去。爸爸一入房……
鏗：咕咕~~咕咕~~(整埋聲扮訓)
鏗：我訓左喇！(單起隻眼)
20)叫亞媽起身篇
鏗：媽咪快d起身啦！太陽伯伯出左黎曬住你patpat喇！
媽：我好眼訓俾我訓多陣啦！
鏗：媽咪懶訓豬快d起身呀！(跟手扯開我將被)
嗚嗚~~~七點半都未夠我尋晚三點幾先訓到呀先生。
21)講故事篇
鏗：媽咪講綿花糖故事我聽啦。
媽：好，咁你拎本書過黎啦。
之後鏗就好乖拎本書俾我等我講故事，故事講完我叫佢擺好本書。
鏗：到我講俾你聽喇。
媽：好呀！你講啦。
鏗鏗好認真地掀開
鏗：故事開始……有老鼠三兄弟
之後掀掀掀
鏗：有綿花糖，之後病左講完！
一個我講左十分鐘有多的故事，鏗精簡到得番四句。哈哈哈
多多事實
22)食飯篇
媽：快d食飯啦！唔好含住呀！
媽：你識唔識吞呀！係咪要我打你？
鏗：咳咳咳……咳咳……
鏗：鏗鏗病呀~要睇醫生呢(自己邊講邊偷笑)
媽：病都要食埋先，食埋即刻去睇醫生。
鏗 : 我無病病喇!唔駛睇醫生了。
23)投訴篇
爸：唔好玩風扇了。
鏗：唔係呀！係媽咪開得太大整到我”咳嚏”呀！
鏗鏗殘廢篇
24)話說鏗鏗呢排隻眼仔又差左，所以想同佢貼遮眼貼，讓佢好好訓
練一下。
媽：鏗鏗過黎遮眼睛
鏗：唔要呀唔好遮呀！
媽：唔得呀！唔練下你隻眼又唔知走左去邊喇！(跟手貼好左)
鏗：媽咪……媽咪點解黑媽媽嘅？(喊得好淒厲)我見唔到你呀！點
解黑媽媽架……嗚嗚~~~
我驚一驚死啦隻眼咩事呀？唔通呢排個視力突然大倒退？心中不禁寒
顫中，
稍冷靜後就行到梳化坐下。
媽：鏗鏗你行黎媽咪度
鏗即時行到又知我在那裡喎……
再測試下佢，
媽：鏗鏗媽咪做緊咩呀？(張開五隻手指)
照做到呀！
試多一次
媽：鏗鏗(伸出舌頭扮鬼臉)
即時模仿！
豈有此理！又扮野講大話！
媽：王綽鏗你又話黑媽媽見唔到我？咁你點知我做緊咩呀？
有人扮無事仲耍開我話要搣走眼貼！
衰仔呢樣野唔講得笑架！！
25)近來次次出街行無兩行就要人抱。
鏗：媽咪抱抱呀！
媽：唔抱呀！我腰痛抱唔到！
鏗：媽咪我跛跛呀！要抱抱。嗚嗚~~
媽：咪扮喇！快d行！
26)下午出去買餸
媽：鏗一陣唔拎bb車喇！你自己行啦！
鏗：唔好呀！要拎bb車鏗鏗一陣想訓覺呀！
媽：唔拎呀！返黎先訓啦！
鏗：俾我拎啦鏗鏗要訓架，嗚嗚~~
呢期超煩郁下就喊，激死人了。
鏗鏗長大了
老公返工，但慶幸我有位小看護照顧我。剛剛鏗鏗在枱上拿了我的水
杯給我叫我要飲水。之後他說自己吃東西弄糟了手自己去洗手間洗手
。又自己開水刷牙洗面，還告訴我待會要vv時會小心不弄濕地方及
褲子。暫時他都比平日乖，沒有煩著我，只是自己在廳玩耍，偶爾弄
些玩具曲奇叫我要吃東西。小傻瓜我愛你
今日馬灣沙灘之旅俾我發現鏗鏗真係超古惑勁百厭
罪行1) 當我們搭船過馬灣途中，有位小朋友要佢媽咪扮訓覺，之後……佢竟
然痴埋佢老豆身邊，指手劃腳同細細聲講出佢的陰謀！幸好個衰老豆
忍唔住笑爆左出黎。唔係呢個正在扮訓的媽媽就要硬俾佢塞隻臭鞋入
口喇！
罪行2)到達沙灘竟巧遇connie ee同哈哈，當大家開開心心拎個水桶出去海邊裝水時，有位小朋友
靜雞雞裝好水之後潛到connie ee背後有所行動！！慶幸百厭星爸媽見到，遏止了他。否則con
nie就一身濕加沙了。疑犯心虛即時將水倒在地上大笑。真激死！
罪行3)Alan叔叔請鏗食雪糕，有人扮哂野話唔食喇！點知人地
買到返黎即飛撲去食囉。
罪行4)媽咪犧牲小我，走去同鏗&雋玩水槍，點知呢兩個鬼靈精襯
我無留意噴到我一身一臉都係仲奸笑！
沒有留言:
張貼留言